الجمعة ٢٠ مايو ٢٠٢٢
Lang :

بمنتهى الصراحة - يناير 2022 2022-01-31 13:21:18


بمنتهى الصراحة - يناير 2022

هو احنا بقينا في زمن الكافيهات ؟

" هذه الاحداث ليست من وحي خيال الكاتب .. وأي تشابه في الأحداث أو الشخصيات أو الأسماء هو ليس من محض الصدفة فهو مقصودا و متعمدا"

دايما لينا الشرف اننا نكون متواجدين في معرض إيجي ستتش كراعي اعلامي، ونكون في وسط زباينا و قراءنا.. المرة دي الشرف زاد أكثر لما شوفت مجهود المنظمين في الدورتين ( الملابس و النسيج) و إزاي بيحاولوا يطوروا و يجددوا و يطلعوا المعرض في احسن صورة في ظل ظروف صعبة للسوق علي الجميع ومع ذلك دايما بيسعوا و عملوا في دورة الملابس الاولانية تطور جديد بمؤتمر خاص بالملابس اتكلم فيه قامات كبيرة من الصناعة و افتتحه الدكتور أحمد مصطفي رئيس الشركة القابضة للغزل و النسيج بجانب دورة تدريبية للطباعة الديجيتال ومسابقة لأحسن تصميم للطباعة الديجيتال بالتعاون مع د.محمود عباس، كل ده كان بالتوازي مع المعرض فخلق حالة ايجابية وحلقات نقاشية وطرح معلومات مهمة لمستقبل الصناعة.

فاحب أقدم التحية لمنظمي المعرض علي  سعيهم الدائم للتطوير حتي في الظروف الصعبة و على رأسهم كريم شلبي و هيثم راضي و طبعا كتيبة الجنود اللي وراهم اللي تقريبا ما بيناموش من قبل المعرض ما يبتدي. و تحية لكل العارضين اللي قرروا يعرضوا في المعرض و بيكملوا سعيهم و ما قرروش انهم ما ينزلوش المعرض و تحية لكل اللي قرر يسيب مصنعه و شغله وييجي يزور المعرض. تحية لكل اللي بيسعي، في النهاية الظروف الصعبة مهما طالت بتعدي و هيفضل اللي بيسعي.

ودلوقتي شوية ملاحظات لفتت نظري في المعرضين:

  • كان فيه ناس جديدة عارضة و دي علامة ايجابية زي BG Group بتوكيل ماكينات طباعة جديد و Garment IO  
  • فيه ناس من الوكلاء بالاخص في التطريز ما قدرتش تعرض علشان ماكيناتهم اتعطلت في الميناء بسبب اللخبطة في اجراءت الجمارك الجديدة.
  • عدد كبير من اصحاب المصانع زاروا المعرضين و عادة بيزوروه كل مرة زي استاذ عمار القبيسي و استاذ هاشم العلبي و استاذ محمد صباح و استاذ سمير رياض لكن الجديد كان تواجد استاذ خالد رأفت و اعجابه بحجم المعرض و الماكينات المتواجدة فيه و رائد صناعة الملابس الاستاذ جلال الزوربا.
  • مع انه ما بيعلنش معانا بس احب اظهر اعجابي بالشاب ياسر عثمان صاحب شركة سوتك على افكاره التسويقية المبتكرة اللي دايما بتشد الزائرين للمعرض و بتلفت نظرهم.
  • اغلب العارضين كان مبسوطين في نهاية المعرض و كثير منهم باعوا كويس خلال أيام المعرض أو اتقابلوا مع عملاء مهمين هيخلصوا معاهم بعد المعرض.
  • محدش تقريبا بيلبس ماسكات في المعرض و ده مش غريب لان محدش بيلبس ماسكات في البلد إلا نسبة قليلة وده طبيعي لان البلد ما فيهاش كورونا..!!
  • ارتفاع اسعار الغزل ملخبط الدنيا و مخلي بعض المصانع مش عارفه تسعر و لا عارفه تشتغل لأن كلهم شايفين أن المستهلك النهائي مش هيقبل أي زيادة في الاسعار وده اللي كان ظاهر في تصريح قاله استاذ محمد عبد السلام ان اسعار الملابس للمستهلك احتمال تزيد من 50 إلى 80% في الفترة اللي جاية، لو حصل ده فعلا هتبقي فيه مشكلة كبيرة في السوق المحلي و معدلات الشراء هتقل أكثر ما هي قليلة اساسا.
  • كذا مصنع من اللي قابلتهم اللي مش بيصدروا أو بيشتغلوا اكثر سوق محلي عايزين يركزوا أكثر على التصدير علشان السوق المحلي بقي صعب و ما فيهوش سيولة كافية ولا مع التاجر و لا مع المستهلك النهائي. اتمني الظروف الاقتصادية تتغير قريب، اصل من الغريب أن يكون عندك 100 مليون مستهلك و يبقي عندك مشكلة انك تبيع في السوق المحلي دي غريبة قوي لانك في نفس الوقت تلاقي الكافيهات ما فيش أكثر منها و بتفتح في كل خرم إبره و ما شاء الله دايما مليانة زباين مع أنها مش رخيصة.. ولا احنا بقينا في زمن الكافيهات واللي عنده مصنع يقفله أو يبيعه و يقلبه كافيه و يدرب العمال على خط انتاج سندوتش الروزبيف و إزاي يعملوا كابتشينو و يرصوا حجر الشيشة.!!

وأخيرا.. يسعدني ارحب  بالاستاذ محمود قطب اللي هيبتدي يكتب معانا سلسة مقالات عن قماش الملابس الرياضية و اهمية صناعة الملابس الرياضية، والدكتورة داليا كمال اللي قدمت محاضرات مهمة في معرض ايجي ستتش لماكينات النسيج  عن الطباعة الديجيتال و دلوقتي هتتبتدي تنقل خبرتها عن المجال على صفحات المجلة.

بقلم : أحمد المغلاوي

Meghalawi@khoyout.com

info@khoyout.com